(ရစိတမိဒံ လေခနံ ဓမ္မသာမီစရိယေန မရမ္မရဌေ မဟာဂိရိနဂရေ သျာမ ဒေသိယဗုဒ္ဓိကနိခိလဝိဇ္ဇာလယဿ အဓိကာရပတိနာ။)

(ကရုဏာ-compassion, ဝိဝါဒေါ-debate, ပါစိနဒီပိကာ-Asian, အပရဒီပိကာ-Westerner, ဝေဒိကာ-scientists, စိတ္တသ တ္ထ ဝေဒိကာ- psychologists, မတ္ထလုင်္ဂသတ္ထကုသလာ-neurologists, မဟာစရိယော-professor, အာစရိယော-doctorate degree holder, နိခိလ၀ိဇ္ဇာလယော-university, သမနုညော-recognition) 

နမော တဿ ဘဂဝတော အရဟတော သမ္မာသမ္ဗုဒ္ဓဿ မဟာကါရုဏိကဿ။

အာရမ္ဘကထာ (Introduction)

ဣမသ္မိံ ကါလေ နာနာဇာတိကပဏ္ဍိတေသု ဗုဒ္ဓပါဝစနံ ဥဂ္ဂဏှန္တေသု ယောဂါဝစရေသု စ ဧကေါ ဝိဝါဒေါ အတ္ထိ ကရုဏါဘာဝနာယ ပဋိဝေဓ‌သမတ္ထပဋိသံယုတ္တော။ သော ပန ဝိဝါဒေါ သက္ကောတိ ဝါ နော ဝါ ကရုဏာဗလေန စတ္တာရိ အရိယသစ္စာနိ ဝိဗုဇ္ဈိတွာ ဒုက္ခနိရောဓံ သစ္ဆိကာတုံတိ။

ဣမသ္မိံ ဟိ သင်္ခေပပဏ္ဏေ ပထမံ တာဝ ပစ္စုပ္ပန္နကာလေ ဥရောပအမေရိကသင်္ခါတေသု အပရဒီပေသု ဗုဒ္ဓဒေသိတါယ သတိပဋ္ဌာနဘာဝနာယ စ ကရုဏါဘာဝနာယစ ပါကဋဘာဝံ ကထေဿာမိ။ တတော ပရံ ဣမဿ ဝိဝါဒဿ နိဒါနံ ပညပေတဗ္ဗံ။ အဝသာနေ ထေရဝါဒိနော မတိ သင်္ခေပေန ၀ိစိက္ခိတဗ္ဗာ။

အပရဒီပိကန္တရေသု ပါကဋသတိပဋ္ဌာနကမ္မဋ္ဌာနံ

(Mindfulness Practice Prevailing among Westerners)

ဣဒါနိ အပရဒီပေသု စိတ္တသတ္ထဝေဒိကာ စေဝ မတ္ထလုင်္ဂသတ္ထဝေဒိကာ စ ဗုဒ္ဓေန ဒေသိတံ သတိပဋ္ဌာနဘာဝနံ အတိဝိယ မနသိကရောန္တိ ရုစ္စန္တိ ဥဂ္ဂဏှန္တိ သယံ ဘာဝေန္တိ ဗဟုလီကရောန္တိ။ အပိစ ပရေသံပိ တထေဝ ဥဂ္ဂဏှာပေန္တိ ဘာဝနံ ကာရာပေန္တိ။ တေသု ဝေဒိကေသု ကေစိ တေ ပါကဋေသု ပါကဋေသု နာနာနိခိလဝိဇ္ဇာလယေသု မဟာစရိယာ ဟောန္တိ တေကိစ္ဆကာ စ။

Prof. Jon Kabat-Zinn (1944 - )

Massachusetts Institute of Technology, USA

Jon Kabat-Zinn တိနာမကော မဟာစရိယော အမေရိကရဋ္ဌေ Massachusetts Institute of Technology နာမနိခိလဝိဇ္ဇာလယဿ ဘေသဇ္ဇသာလာယံ ဆသတ္တတိနဝသတါဓိကသဟဿ (1976) Christ ဝဿတော ပဌာယ စိရကာလဂိလာနာနံ သတိပဋ္ဌာနေ ဝေဒနာနုပဿနာဘာဝနံ ကာရာပေတွာ စိရကာလံ ဝေဒယိတဒုက္ခဝေဒနာ မုဉ္စာပေတိ။ ဣဒါနိ သကလလောကေ အညတိကိစ္ဆကာ စိတ္တသတ္ထဆေကာ စ မတ္ထလုင်္ဂသတ္ထကုသလာစ တဿ သန္တိကေ သတိပဋ္ဌာနံ ဥဂ္ဂဟေတွာ နာနာရဌေသု ဂိလာနာနံ ကာယိကစေတသိကဒုက္ခဝေဒနာယ မုစ္စာပေန္တိ။

Publications on Mindfulness

1 (1982); 10 (2000); 147 (2010); 842 (2018)

သံဝစ္ဆရေ သံဝစ္ဆရေ သဟဿပမာဏါနိ သတိပဋ္ဌာနသံယုတ္တလေခနာနိ ရစန္တိ မုဒ္ဒါပေန္တိ။ နဟေဝိဒါနိ အပရဒီပေသု ဂိလာနာယေဝ သတိပဋ္ဌာနံ ဘာဝေန္တိ၊ နာနာဝိဇ္ဇာလယေသု တရုဏဒါရကာဒါရိကာ ပိ ဘာဝေန္တိ ဂဟပတိယော စ ဂဟပတိနိယော စ။

Mindfulness in Schools

Mindful Family

ဣဒါနေတံ စိတ္တဘေသဇ္ဇကမ္မံ အင်္ဂလိသ -ဘာသာယ Mindfulness-Based Stress Reduction/ MBSR သတိပဌာနမူလက -သောကါပနယနနယောတိ ပါကဋော ဟုတွာ ဗဟူနံ တိကိစ္ဆကာနံ သမနုညဘာဝေါ လဒ္ဓေါ ဟောတိ။

အပိစ နတ္ထိ တေသံ သတိပဋ္ဌာနပဋိဗဒ္ဓဝိဝါဒေါ။ သဗ္ဗေပိ တေ သတိပဌာနာနိသံသံ သာမံယေဝ ပဿိတွာ ဧကန္တေန သဒ္ဒဟန္တိ။

ကရုဏါဘာဝနာပိ ပါကဋာ

(Compassion Meditation also Becomes Prominent) 

သတိပဋ္ဌာနေ ပါကဋဘာဝံ အာဂစ္ဆန္တေ တေ ပဏ္ဍိတာ ဗုဒ္ဓဒေသိတံ ကရုဏါဘာဝနံပိ ဒိသွာ မနသိ ကရောန္တိ ပရိယာပုဏန္တိ ဘာဝိတုံ အာရဘန္တိ။ ဣဒါနိ ကရုဏာဘာဝနာပိ ပါကဋဘာဝံ ဂစ္ဆတိ။ ပဿေယျာထ ဣမာနိ ပေါတ္ထကာနိ တေဟိ သံဝိဟိတာနိ။ 

အပိစ တိံသာဓိကမတ္တ လေခနနာနိ သမောဓါနံ ကတွာ ဣမံ ပေါတ္ထကံ မုဒ္ဒါပေသိ Oxford နိခိလဝိဇ္ဇာလယမုဒ္ဒါလယေ။

ဣမံ ပနေတ္ထ တေဟိ အပရဒီပိကယောဂါဝစရေဟိ လိခိတံ ပကါသိတံ ကရုဏါဘာဝနာပဋိပဒံ သင်္ခေပေန ဘာသိဿာမိ။ 

ကရုဏါဘာဝနံ ဘာဝိတုကာမော ယောဂါဝစရော ပထမံ ပရဿ ကယိကစေတသိကဒုက္ခံ အာရမ္မဏံ ဂဟေတွာ အတ္တနော စိတ္တေ ယာဝ ဥပစာရသမာဓိံ ကရုဏါဘာဝနံ ဘာဝေယျ။ သစေ ဧဝံ ဘာဝယမာနဿ တဿ သောကဗျာပါဒဒေါမနဿာဒိ စိတ္တပဋိကိရိယာ ဥပ္ပဇ္ဇေယျ ဝုဋ္ဌဟေယျ ၀ါ၊ သတိပဋ္ဌာနသုတ္တေ အာဂတနယေန အတ္တနော စိတ္တံ ဇာနိတဗ္ဗံ။ ယံ ယံ စိတ္တံ ဥပ္ပဇ္ဇတိ၊ တံတံ အဝိတက္ကေန္တော အသဉ္ဇာပေန္တော သတောဝ သမ္ပဇာနော တံစိတ္တသဘာဝဓမ္မံယေဝ အနုပဿိတွာ အနုပဿိတွာ ပဇာနိတုံ အာရဘေယျာတိ အတ္ထော။

ဝုတ္တမေတံ သတိပဋ္ဌာနသုတ္တေ “သဒေါသံ ဝါ စိတ္တံ သဒေါသံ စိတ္တံတိ ပဇာနာတိ၊ နိဒ္ဒေါသံ ဝါ စိတ္တံ နိဒ္ဒေါသံ စိတ္တံတိ ပဇာနာတီ”တိ။ မဓုပိဏ္ဍိကသုတ္တေပိ “ယံ ဝေဒေတိ တံ သဉ္ဇာနာတိ၊ ယံ သဉ္ဇာနာတိ တံ ဝိတက္ကေတိ၊ ယံ ဝိတက္ကေတိ တံ ပပဉ္စေတိ တတောနိဒါနံ ပုရိသံ ပပဉ္စသညာသင်္ခါ သမုဒါစရန္တိ အတီတာနာဂတပစ္စုပ္ပန္နေသု မနောဝိညာဏေသု ဓမ္မေသူ”တိ အာဂတံ ယေဝ။ (မ၊ ပါ၊ ၁၊ ၁၅၈)

ဝုဋ္ဌဟိတဗျာပါဒါဒိစိတ္တဿ အနုပဿိတွာ အနုပဿိတွာ ပဇာနနမေဝ ယောဂါဝစရဿ ပဓါနကမ္မံ။ ဧဝံ ပုနပ္ပုနံ ဘာဝိတော ဗဟုလီကတော သော အတ္တနော စိတ္တေ သောကဗျာပါဒါဒိဒေါသပဋိသံယုတ္တ သင်္ခါရဓမ္မာ တနုဘာဝံ ဂစ္ဆန္တိ။ ဧတ္ထ ဟိ ပရဿ ဒုက္ခံ အာရမ္မဏံ ဂဏှန္တော သစေ အတ္တနော အဇ္ဈတ္တသန္တာနေ ယံယံ ဥပ္ပဇ္ဇဒေါမနဿံ အာရဗ္ဘ သော ဝိတက္ကေယျေ သဉ္ဇာပေယျ၊ တဿ အညနီဝရဏာနိ ပိ ဥပ္ပဇ္ဇိဿန္တိ။ တသ္မာ သတိပဋ္ဌာနစိတ္တာနုပဿနာပဗ္ဗေ အာဂတနယေန ဥပ္ပန္နံ ဥပ္ပန္နံ အတ္တနော စိတ္တသင်္ခါရံ ပဇာနနမာနော တာနိ နီဝရဏာနိ သမထံ ကရေယျ။

တေသု နီဝရဏိယေသု တနုဘာဝံ တင်္ခဏိကေန သမထဘာဝံ ပတ္တေသု ကရုဏာဘာဝနာ ဘာဝေတဗ္ဗာ။ ပရဒုက္ခဿ အပနယနကာမစိတ္တံ ဘာဝေယျာတိ အဓိပ္ပါယော။ “အဗျာပဇ္ဇော ဟောဟိ၊ အနီဃော ဟောဟိ၊ ဒုက္ခာ ပမုဉ္စာဟီ”တိ အာဒိနာ ပရိကမ္မေန ဧကေကဒုက္ခိတပ္ပတ္တပုဂ္ဂလံစေဝ တတောပရံ တံသမူဟံ စ အာရမ္မဏံ ကတွာ ဒယံ အနုကမ္ပံ ကရုဏာဟဒယံ ဘာဝေယျ ဗဟုလီကရေယျ။ (ပိဌေ ၁၃၄။)

ယဿ ဟိ ဧဝံ စိတ္တံ ကရုဏာကမ္မဋ္ဌာနေ အနုယုဉ္ဇေန္တဿ ယောဂါဝစရဿ စိတ္တံ ကာရုဏိကဘာဝံ ဥပ္ပဇ္ဇတိ၊ ပရဿ ဒုက္ခံ ဟနိတုံ အပနယိတုံ တဿ ဣစ္ဆာ အဘိဏှံ ဘဝတိ အနုကမ္ပံ ဥပါဒါယာတိ အတ္ထော။

Dr. Helen Weng (PhD)

Professor of Psychiatry University of California-San Francisco

Dr. Brianna Schuyler

Prof. Richard Davidson 

ကရုဏါသမ္ပယုတ္တစိတ္တံ ဟိ ပရေသံ အတ္ထာယ ဟိတာယ ဝိတက္ကံ ဥပ္ပါဒေတိ။ ဗဟုဇနတ္ထာယ ဗဟုံ ဝိရိယဆန္ဒံ ဇနေတိ၊ ဗဟူနံ ဒုက္ခံ အပနယိတုကာမော စရတိ ကရုဏာစေတသာတိ ဣမသ္မိံ ပေါတ္ထကေ တယော အပရဒီပိကလေခကာ လိခန္တိ။ ကေ ပန တေ လေခကာတိ?

(၁) Dr. Helen Weng (၂) Dr. Brianna Schuyler (၃) Prof. Richard Davidson တိ။ တေဟိ ရစိတော ကရုဏါပဋိပဒါနယော ထေရဝါဒီနံ ဝါဒေန န ဝိရုဒ္ဓေါ။

မတ္ထလုင်္ဂသတ္ထဆေကါနံ ကရုဏာဘာဝနာပဋိဗဒ္ဓလေခနံ

( Some Writing on Compassion by Neurologists)

Dr. Olga M. Kilmecki  

Dr. Tania Singer

ဣဒါနိ ခေါ ပနေတ္ထ မတ္ထလုင်္ဂသတ္ထဝေဒိကာနံ လေခနံပိ ပကာသေဿာမိ။ ပုဗ္ဗေ ယထာ ၀ုတ္တမေ၀ ဗဟူ ပဏ္ဍိတာ ကရုဏာပဋိဗဒ္ဓါနိ နာနာ လေခနာနိ ရစယန္တိ။ တေသု လေခနေသု ဒွိန္နံ လေခကာနံ လေခနံ နိဿာယ ပကာသေဿာမိ။ ဣမသ္မိံ ပေါတ္ထကေ Olga M. Kilmecki တိစ Tania Singerတိ ဒွီဟိ အာစရိယေဟိ ရစိတေ ဧကသ္မိံ ပဏ္ဏေ ကရုဏာဘာဝနာဗလေန မတ္ထလုင်္ဂဿ အနာရောဂျတံ ဥပ္ပဇ္ဇနဘာဝံ လိခန္တိ။ မတ္ထလုင်္ဂေ အနာရောဂျေ သတိ သုခံ စေတသိကံ ဝေဒယတီတိ ဝဒန္တိ။ (၁၁၈ ပိဌေ) 

စေတသိကသုခေ ပုနပ္ပုနံ ဥပ္ပဇ္ဇန္တေ မတ္ထလုင်္ဂဿ ပုဗ္ဗဘာဂေါ ဗလဝါ ကမ္မပါဂုညော ပဋိဗလော ဟောတိ၊ (ပဿေယျာထ ဣမံ ဆာယာရူပံ) ပရဘာဂေါ ပန မတ္ထလုင်္ဂဿ ဗလဝါ ဟောတိ ကမ္မညတာ ဒုမ္မနဿိကကာလေ’ (ဣဒံ ပိ ဆာယာရူပံ တေဟိ ဒိန္နံ။) ဣတိ ဧတေ ဒွေ လေခကာ ဗဟူနိ သောမနဿဒေါမနဿဝေဒယိကာနံ မနုဿာနံ မတ္ထလုင်္ဂါနိ ဝိစိနိတွာ ဝိစာရေတွာ ဧဝံ ပဿိံသု။

နနု ထေရဝါဒီနံ အဘိဓမ္မပိဋကေ အနန္တသမန္တနယပါဠိယံ ပိ ဧံဝံ အာဂတော “ဟေတူ ဟေတုသမ္ပယုတ္တကါနံ ဓမ္မာနံ တံသမုဌာနာနဉ္စ ရူပါနံ ဟေတုပစ္စယေန ပစ္စယော။ … စတ္တာရော ခန္ဓာ စတုန္နံ မဟာဘူတာနံ ဥပါဒါနဉ္စ ရူပါနံ သဟဇာတပစ္စယေန ပစ္စယော’တျာဒိ။

မတ္ထလုင်္ဂံ စိတ္တသမုဌာနရူပံ။ သောမနဿံ ဒေါမနဿံစ စိတ္တံ ဝိညာဏက္ခန္ဓေ ပရိယာပန္နာနိ ဟောန္ထိ၊ တေဟိ သမ္ပယောဂစေတသိကာ တီသု အညနာမက္ခန္ဓေသု ပရိယာပန္နာ။ ဣဓ စိတ္တစေတသိကါနံ နိဿာယ မတ္ထလုင်္ဂသင်္ခါတဿ ရူပဿ ဗလဝတံ သမ္ဘဝေါ။ အယံ ပန အပရဒီပိကဝေဒိကာနံ ကရုဏာပဋိသံယုတ္တံ ပရိယေသနံ သုတေသနံ ဝိစယောတိ ဝေဒိတဗ္ဗော။

ကရုဏာဘာဝနာယ ဝိဝါဒေါ (Debate on Compassion)

ဣဒါနိ ခေါ ပနေတ္ထ သော ကရုဏာဘာဝနာပဋိသံယုတ္တဝိဝါဒေါ ပကါသိတဗ္ဗော။ (သိရိမတော သမ္မာသမ္ဗုဒ္ဓဿ ပရိနိဗ္ဗာနကါလတော ဧကသတဝဿကါလေ ဘိက္ခုသံဃေ ကေစိ နိဿဂ္ဂိယ ပါစိတ္တိယဝိနယသိက္ခာပဒါနိ အာရဗ္ဘ နာနာဝါဒါ အဘဝိံသု။  ဗုဒ္ဓမတညူနံ ထေရာနံ မတိယာ အသဒိသံ မတိံ ဂဏှိတွာ ဧကေ ဘိက္ခူ အဝိသဘာဂဂဏံ ဥပ္ပါဒေသုံ။ ပရိနိဗ္ဗာနတော တိံသာဓိကဒွိသတဝဿမတ္တကါလေပိ ပုန အဌာရသမတ္တသံဃဂဏာ ဘိက္ခူ ဓမ္မေသု နာနာဝါဒေ ဥဂ္ဂဟိတွာ တထေဝ နာနာဘိက္ခုသံဃဂဏါ အဟေသုံ။ မောဂ္ဂလိပုတ္တတိဿမဟာထေရေန ရစိတေ ကထာဝတ္ထုနာမ အဘိဓမ္မဂန္ထေ သဗ္ဗေပိ တေ ဝိဝါဒါ သုဌု ဝိဘဇိတာ ဟောန္တိ။) ပရိနိဗ္ဗာနတော သဌိပဉ္စသတါဓိကဒွိသဟဿဝဿေ အမှာကံ ပစ္စုပ္ပန္နကါလေ (ပိ) သကလလောကေ တယော သံဃဂဏာ ဟောန္တိယေဝ ထေရဝါဒေါ စ ဘိက္ခုသံဃော မဟာယာနိကော စ ဝဇိရယာနိကေါ စာတိ။

သတိပဋ္ဌာနဉ္စ ကရုဏါဘာဝနဉ္စ ဥဂ္ဂဏှန္တေသု အပရဒီပိကေသု စိတ္တသတ္ထကုသလာ Dr Brooke Levelle နာမ ဥပါသိကာ ဧဝံ ဝဒတိ “မဟာယာနိကာစေဝ ဝဇိရယာနိကာ စ ကရုဏါဘာဝနာယ ပဋိဝေဓသမတ္ထဘာဝံ သဒ္ဒဟန္တိ။ ကရုဏာ ဒုက္ခနိရောဓဂါမိနီပဋိပဒါယ ပဓါနင်္ဂါ။ နဟေဝံ ထေရဝါဒီနော၊ ကရုဏါ ဥပတ္ထမ္ပကမတ္တာဝေ န ပဓါနာတိ”။

Compassion in Context: Tracing the Buddhist Roots of Secular, Compassion-Based Contemplative Programs Brooke D. Lavelle

Dr. Brooke Lavelle 

ကသ္မာ ထေရဝါဒိနော ကရုဏါယ ပဋိဝေဓသမတ္ထေ န သဒ္ဒဟန္တီတိ ပုစ္ဆမာနော အယမေဝ ပစ္စယော အယမေ၀ ကာရဏေါတိ Dr Brooke Lavelle တိ လေခကာ ဥပါသကာ ဝဒတိ “ ထေရဝါဒိနော ဧဝံ ဗုဒ္ဓေန ဘာသိတဿ အတ္ထံ ဇာနန္တိ၊ ဒုက္ခံ ယဿ ဥပ္ပဇ္ဇတိ အနိစ္စေ နိစ္စသညိတာ အနတ္တေ အတ္တသညိတာ ဝိပလ္လာသသညိတေ ဌာနေ အဘိဇ္ဈာဒေါမနဿသင်္ခါတာနံ သင်္ခါရဓမ္မာနံ ပဝတ္တတ္တာတိ။ သင်္ခတဓမ္မေသု အနိစ္စညာဏံ အနတ္တညာဏံ လဘိတွာ သော ဒုက္ခနိရောဓံ နိဗ္ဗာနံ သစ္ဆိကရေယျာ”တိ။

န ဟေတံပိ ၀စနံ ထေရဝါဒီနံ ဝါဒေန ဝိရုဒ္ဓံ။ Dr Brooke Lavelle ဥပါသကာ Rupert Gethin နာမကံ ထေရ၀ါဒိံ အာဘိဓမ္မိကံ ပါဠိတေပိဋကဆေကာစရိယံ နိဿာယ လိခတိ။ Gethin- မဟာစရိယဿ ပကတိ လေခနံ ပိ န ဗုဒ္ဓဒေသိတေန ဝိရုဒ္ဓံ။

Prof. Rupert Gethin (1957 - ) President, The Pali Text Society

Gethin မဟာစရိယဿ လေခနံ အာရဗ္ဘ အညော John Makransky နာမကေါ ဝဇိရယာနိကေါ အတ္တနောမတိယာ ထေရဝါဒီနံ မတိံ ဧဝံ ဝိတက္ကေတွာ ပကာသေသိ “ဒုက္ခနိရောဓံ ပန ဝိမုတ္တိံ သစ္ဆိကာတုံ အယမေဝ ပဋိပဒါ သီလသမာဓိပညာသင်္ခါတာ တယော သိက္ခာ ဟောန္ထိ၊ တေသု ပညာယယေ၀ ဒုက္ခနိရောဓဂါမိနီပဋိပဒါဘာဝေန ပညာပနတော သာ ယေဝ ပညာ ပဋိဝေဓသမတ္ထာ၊ န ကရုဏာ။ ကရုဏါ ဟိ စတုသစ္စံ ဝိဗုဇ္ဈိတုံ ဝိမောက္ခံ သစ္ဆိကာတုံ ဥပတ္ထမ္ပကါယေဝ ဟောတိ၊ န ဇနကာ”တိ။ 

Prof. John Makransky

ဣဓ ဘန္တေ ပဋိကစ္စေ၀ ဌပိတံ အမှာကံ ပဓါနပုစ္ဆံ ပုန ပုစ္ဆေယျံ - သက္ကောတိ ဝါ နော ဝါ ကရုဏာဘာဝနာဗလေန ဒုက္ခဿ အန္တကိရိယာယာတိ။

သတိပဋ္ဌာနသုတ္တေ ဓမ္မာနုပဿနာယံ သစ္စပဗ္ဗေ ဧဝံ အာဂတံ “ကတမော စ ဘိက္ခဝေ သမ္မာသင်္ကပ္ပေါ၊ နေက္ခမ္မသင်္ကပ္ပေါ အဗျာပါဒသင်္ကပ္ပေါ အဝိဟိံသာသင်္ကပ္ပေါ အယံ ဝုစ္စတိ ဘိက္ခဝေ သမ္မာသင်္ကပ္ပေါ“တိ။ (မ၊ ပါ၊ ၂၊ ၈၈)

ဣဓ အဝိဟိံသာ ၀ုစ္စတိ ကရုဏာ၊ အဝိဟိံသာသင်္ကပ္ပေါ ပညာသိက္ခာယ သင်္ဂဟိတော ဟောတိ ပညက္ခန္ဓေ ပရိယာပန္နော။ တသ္မာ ကရုဏာပိ ဒုက္ခနိရောဓေဂါမိနီပဋိပဒါယ အန္တောဂဓံ ဂစ္ဆတီတိ ကဒါစိ စိန္တေမိ။ နတ္ထိ သမ္မာသင်္ကပ္ပေါ ဝိနာ အဝိဟိံသာသင်္ကပ္ပေန၊ အပိစ နတ္ထိ အဝိဟိံသာသင်္ကပ္ပေါ ဝိနာ အဝိဟိံသာယ ကရုဏာယ၀ါတိ ဣဒံ ပနေတ္ထ မယှံ စိန္တနကာရမတ္တမေ၀၊ န ၀ိနိစ္ဆယော။ 

အာယသ္မာ ပန နန္ဒမာလာဘိဝံသတ္ထေရော အဂ္ဂမဟာပဏ္ဍိတော အမှာကံ ဂရုကရဏီယာစရိယော ဧဝံ ၀ဒတိ “သင်္ကပ္ပေါ ပညာယ ဥပကာရတ္တာယေ၀ ပညက္ခန္ဓေ သင်္ဂဟိတော၊ န ပညာကိစ္စတ္တာ။ ကရုဏာသင်္ကပ္ပ ပညာင်္ခါတာ ဣမေ တယော ဓမ္မာ နာနာ ကိစ္စာ ဟောန္တိ၊ တေသု ကရုဏာ ပုဗ္ဗဘာဂေယေ၀ လဗ္ဘတိ၊ န မဂ္ဂက္ခဏေ။ သင်္ကပ္ပပညာယော ပန မဂ္ဂက္ခဏေပိ လဗ္ဘန္တိ၊ တာသုပိ ပညာဧ၀ ဇာနနကိစ္စံ ကရောတိ၊ န သင်္ကပ္ပေါ“တိ။ ၁

၁။

—————————

(အယံ ပန အာယသ္မတော နန္ဒမာလာဘိ၀ံသမဟာထေရဿ ပရိပုဏ္ဏ ၀ိဘဇနံ)

ကရုဏာ သင်္ကပ္ပ ပညာ အဝိဟိံသာသင်္ကပ္ပေါတိ ဧတ္ထ အဝိဟိံသာ နာမ ကရုဏာ၊ သင်္ကပ္ပေါ နာမ ဝိတက္ကော၊ အဝိဟိံသာပဋိသံယုတ္တော သင်္ကပ္ပေါ အဝိဟိံသာသင်္ကပ္ပေါ။ ဣမိနာ ဝစနတ္ထေန အဝိဟိံသာ သင်္ကပ္ပေါနာမ ဝိတက္ကောယေဝ လဗ္ဘတိ၊ န ကရုဏာ။ ကသ္မာ? တပ္ပုရိသသမာသတ္တာတိ။ အယံသဒ္ဒနယော။ အယံ ပန အဘိဓမ္မနယော- ကရုဏာ မဟာကုသလ မဟာ ကိရိယစိတ္တေသု စ ပထမဒုတိယ တတိယစတုတ္ထဇ္ဈာနစိတ္တေသုစာတိ အဋ္ဌဝီသတိစိတ္တေသု ဧဝံ လဗ္ဘတိ။ တသ္မာ လောကုတ္တရ စိတ္တေသု န လဗ္ဘတိ။ သင်္ကပ္ပေါ ပညာယ ဥပကာရတ္တာ ဧဝံ ပညက္ခန္ဓေ သင်္ဂဟိတော၊ န

ပညာကိစ္စတ္တာ။ ကရုဏာသင်္ကပ္ပပညာသင်္ခါတာ ဣမေ တယော ဓမ္မာ နာနာကိစ္စာ ဟောန္တိ၊ တေသု ကရုဏာ ပုဗ္ဗဘာဂေ ယေဝ လဗ္ဘတိ၊ န မဂ္ဂက္ခဏေ။ သင်္ကပ္ပပညာယော ပန မဂ္ဂက္ခ ဏေပိ လဗ္ဘန္တိ၊ တာသုပိ ပညာ ဧဝ ဇာနနကိစ္စံ ကရောတိ၊ န သင်္ကပ္ပေါ။ အယမေတ္ထ သင်္ခေပေန ဒဋ္ဌဗ္ဗော၊ အဝိဟိံသာသင်္ကပ္ပေါ ဧတ္ထ ကရုဏာ ဥပနိဿယပစ္စယဝသေန ၊ သင်္ကပ္ပေါသဟဇာတပစ္စယဝသေန

ယဒိ ပညာယေ၀ အဝဗုဇ္စနကိစ္စံ သာဓေတီတိ ပုစ္ဆမာနော ယုတ္တမေဝေတန္တိ ပုစ္ဆေယျ။ တထာပိ အရိယမဂ္ဂဿ အဋ္ဌင်္ဂိကာနံ န ဧကေကဿ ပစ္စနီယင်္ဂဿ ဗလေန ပဋိဝေဓနံ ကာတုံ။ ဝုတ္တဉေတံ အဋ္ဌကထာစရိယေန သတိနသုတ္တဝဏ္ဏနာယံ ‘’နေက္ခမ္မသင်္ကပ္ပါဒယော ကါမဗျာပါဒဝိဟီံသဝိရမဏ -သညာနံ နာနတ္တာ ပုဗ္ဗဘာဂေ နာနာ၊ မဂ္ဂက္ခဏေ ပန ဣမေသု တီသု ဌာနေသု ဥပ္ပန္နဿ အကုသလသင်္ကပ္ပဿ ပဒစ္ဆေဒတော အနာပ္ပတ္တိသာဓနဝသေန မဂ္ဂင်္ဂံ ပူရယမာနော ဧကေါဝ ကုသလသင်္ကပ္ပေါ ဥပ္ပဇ္ဇတိ၊ အယံ သမ္မာသင်္ကပ္ပေါ နာမာတိ”။ တသ္မာ သကလအဋ္ဌင်္ဂါနိ သဟ ဟုတွာ ဘာဝေတွာ အဝဗုဇ္ဈနကိစ္စံ ကရောတိ၊ န ပစ္စနီယံ မဂ္ဂင်္ဂံ ဟုတွာတိ။ န ကရုဏာယ ဝိနာ ပညာ၊ န ပညာယ ဝိနာ ကရုဏာတိ အတ္ထော။ ကရုဏာ စ ပညာ စ မဂ္ဂက္ခဏတော ပုဗ္ဗေယေဝ နာနတ္တာ၊ မဂ္ဂက္ခဏေ ဧကတ္တာတိ မညေ။ အယံပိ မေ ၀ိစက္ခနမတ္တမေ၀၊ န ၀ိနိစ္ဆယော။

အဝသာနေ ဣမံ ၀စနံ ဗဟုဂါရ၀စိတ္တေန ဝက္ခာမိ။ ပုထုဇ္ဇနောဟံ အသုတ၀ါ ဂမ္ဘီရံ ကရုဏာဘာ၀နံ ဇာနိတုကာမော ၀ိစိက္ခာမိ ဥဂ္ဂဏှာမိ ဘာ၀ေမိ ၀ိညူနံ သန္တိကေ ဥဂ္ဂဏှာမိ ပရိစယံ ကရောမိ။ ဣမသ္မိံ ပဏ္ဏေ ဧဝံ စိန္တယန္တောပိ ၀ိစက္ခမာနော အဝဗောဓနကိစ္စသာဓနဓမ္မေသု ကရုဏာဘာ၀နာ ဧကာ ဝါ ဟောတိ နော ဝါတိ ဧကန္တေန ၀ဒိတုံ န သက္ကောမိ။ တုမှာကံ ဝိဘဇနံ အတိဝိယ ဇာနိတုကာမောမှိ။

—————————

မဂ္ဂဿ ဥပကာရကောတိ။ တသ္မာ သဒ္ဒနယံ အဘိဓမ္မနယံ စ သမ္မာအဝေက္ခိယ ယထာဘူတံ အတ္ထော ဒဋ္ဌဗ္ဗောတိ။ နန္ဒမာလာဘိဝံသတ္ထေရော (၁၈၊ ၁၁၊ ၂၀၂၀)