Sammodanīyakathā by the Most Venerable Rector Sayadaw Abhidhaja Mahā raṭṭhaguru Nandamālābhivaṃsa Mahāthera

--------------------------------------------------------

nānākulikaraṭṭhanikāyamarammavijite syāmadesiyabuddhatakkasīlāyaṃ katā sahadhammikānaṃ dhammasākacchā Sammodanīyapaṇṇamidaṃ pesitaṃ nandamālābhivaṃsatherena praṅaūḥlvaṅanagaravāsinā.

Sumaṅgalo ayaṃ kālo!

Nānāvohārakusalaṃ, niruttinayapāraguṃ.

Vanditvā dhammavāgīsaṃ, bhāsissaṃ kāraṇaṃ subhaṃ.

Etarahi bahū manussā bhāsantharaṃ sikkhanti, bhāsantarassa kusalā bhavituṃ icchanti, tathāpi appakā eva pāḷibhāsaṃ jānanti. Pāḷi jātā purāṇā avaḷañjitā bahūhi. Kiñcāpi esā purāṇā bahūhi avaḷañjitā, sakalabuddhavacanaṃ pana pāḷibhāsāya nihitaṃ.

pāḷi hi purāṇakāle māgadhikāti viññātā, māgadhikabhāsā sabbasattānaṃ mūlabhāsāti ācariyehi sammatā. Sammāsambuddho pi tepiṭakaṃ buddhavacanaṃ tantiṃ āropento māgadhikabhāsāya eva āropesīti saddahanti. māgadhikabhāsā eva etarahi buddhavacanamupādāya “Pakaṭṭhānaṃ vacanānaṃ āḷi pāḷī”ti vacanatthena pāḷī”ti voharitā.

yā kāci hi bhāsā loke vohāratthāya katā, pāḷi pana visesato buddhavacanapakāsanatthāya yojitāti daṭṭhabbā. amhākaṃ sammāsambuddhena hi pāḷiyā desito dhammo saccakaṭṭhaparamattha-sūcako paṇḍitavedaniyo hoti. Tadatthaṃ yathābhūtaṃ jānitukāmehi pāḷi ekantena sikkhitabbā.

idāni āyasamantehi nānāṭhānesu vasantehi dūratova sahadhammikānaṃ dhammasākacchā nāma sabhā katā honti. imamhi samaye idaṃ bhagavato vacanaṃ sādhukaṃ yeva manasikātabbanti maññāmi- “Nesā sabhā yattha na santi santo,  santo na te ye na vadanti dhamma”nti kiñca bhiyyo, aṅguttaranikāye tikanipāte saṅgāyitaṃ sakalaṃ kathāvatthusuttaṃ sādhukaṃ manasikātabbameva hoti. “Kathāsampayogena bhikkhave puggalo veditabbo “Yadi vā kaccho yadi vā akaccho”tīti ādinā bhagavatā sākacchaṃ karontānaṃ upāyo dassito, ovādo dinno.  

ayañhi tattha vuttā bhagavato kāci anusāsanī idha dassitā, “Sace cassa kathākāmo, kālamaññāya paṇḍito. Dhammattha paṭisaṃyuttā, yā ariyacaritā kathā. taṃ kathaṃ kathaye dhīro, aviruddho anussito” ti idañhi bhagavato anusāsanaṃ manasi sannidhāya katā dhammasākacchā viññūhi pasaṃsaniyā bhavissatiīti. 

ettāvatā amhehi pahitaṃ sammodanīyapaṇṇaṃ nigamitanthi. bahukataṃ tumhehi sādhukaṃ suṇantehi manasikarontehīti.

nandamālābhivaṃsatthero

kattikamāsassa sukkapakkhe dutiiyadivase buddhasāsana 2564 vasse.