ၶူးမေႃတႅမ်ႈၽဵင်း
Dr ၸၢႆးၶမ်းလဵၵ်း တႅမ်ႈဝွၵ်းဝႆႉဝႃႈ -
ယူႇတီႈပီတႆး ထိုင်တီႈပီႈလုမ်ႈၾႃႉၼႆဝႃႇ
ပီလုမ်ႈၾႃႉၼၼ်ႉ
မိူဝ်ႈၽုၵ်ႈ ပဵၼ်ပီမႂ်ႇ 2023 ယဝ်ႉ
မိူဝ်ႈၼႆႉ ပဵၼ်ဝၼ်း သုတ်းထၢႆႉၶွင်ပီၵဝ်ႇ 2022
ဝၼ်းၼႆႉ ပီၵၢႆ
ႁဝ်းမုင်ႈမွင်းပီမႂ်ႇ 2022
ဝၼ်းၼႆႉ ပီၼႆႉ
2022 သမ်ႉတေ မွၼ်းမွၼ်းႁဝ်းယဝ်ႉ
ၵဝ်ႇႁိုဝ် မႂ်ႇ
မၼ်းယူႇတီႈလႂ်? ၽႂ်ၵေႃႉ ႁဵတ်းပဵၼ်? ၽႂ်ၵေႃႉတတ်းသိၼ်ပၼ်? ယူႇၼႂ်းမိုဝ်းၽႂ်တႄႉတႄႉ?
ပေႃးဝၢႆႇတူၺ်းၶိုၼ်း 2022 ၸိုင်
ၵမ်ႈၽွင်ႈ ဢမ်ႇတၼ်းလႆႈႁၼ်သင်မႂ်ႇ
မႂ်ႇဢၼ်ဝႃႈၼႆႉ
ပွင်ႇဝႃႈ - တိုၵ်ႉမီးႁႅင်း တိုၵ်ႉၶိုၼ်ႈ တိုၵ်ႉၶိုပ်ႈၼႃႈ
တိုၵ်ႉမီးၵၢင်ၸႂ် တိုၵ်ႉမီးတၢင်းမုင်ႈမွင်း
ၵူၺ်းၵႃႈ
ပုၼ်ႈတႃႇ ၸိူဝ်းလႆႈပၢႆႈလႆႈၼီ လႆႈမႆႈလႆႈၶီ
လႆၵူဝ်လႆႈႁေယူႇ
ၸိူဝ်းၼၼ်ႉ
ဢမ်ႇမီးသင်မႂ်ႇလႆႈၶႃႈယဝ်ႉ
သင်ၸိူင်ႉဝႃႈ
ငဝ်းလၢႆးတင်းၼွၵ်ႈ ႁဵတ်းႁႂ်ႈပဵၼ်ၼၼ်ၼႆၸိုင်
ၸဝ်ႈၵဝ်ႇတေလႆႈသေႃႉႁႃ ဢဵၼ်ႁႅင်းတင်းၼႂ်း
တူဝ်ၵဝ်ႇၶိုၼ်းယူႇယဝ်ႉ
ပေႃးႁၼ် တၢင်းယိူင်းဢၢၼ်းသေဢၼ်ဢၼ်ယဝ်ႉတႄႉ
ပီလိူၼ်ဝၼ်းယၢမ်း ၵေႃႈ
တေၶိုၼ်းမႂ်ႇမႃးၶိုၼ်းယူႇ
ၸဝ်ႈၵဝ်ႇပဵၼ်ၽူႈတႅပ်းတတ်းဢိူဝ်ႈ
ပၢႆးဝူၼ်ႉတႃႇပိူၼ်ႈ (လေႃးၵတ်ႉထၸရိယ)ၼၼ်ႉ
ၸၢင်ႈၸွႆႈႁူတ်းၼမ်ႉ
ႁႂ်ႈၸႂ်ႁဝ်း ပေႃးၶိုၼ်းမုၼ်းႁုၼ်ႈၶိုၼ်းဢိူဝ်ႈ
မႂ်ႇလႄႈႁုၼ်ႈ
ဝေႃးႁၢရ် သွင်ၶေႃႈၼႆႉ ၼႂ်းၽႃႇသႃႇဢင်းၵိတ်ႉ
ၶဝ်ၵဵဝ်ႇၶွင်ႈၵၼ်ဝႆႉ
မႂ်ႇ new
ႁုၼ်ႈ renew
တင်းသွင် ပွင်ႇဝႃႈ fresh
ႁုၼ်ႈဢမ်ႇၼၼ် renew ၼၼ်ႉ
ပွင်ႇဝႃႈ ၶိုၼ်းမႂ်ႇၼႆဝႃႇ
ယူႇယူႇသေ ၵဝ်ႇၵႂႃႇလႄႈ
လႆႈၶိုၼ်းလုမ်းလႃးႁႂ်ႈမႂ်ႇၶိုၼ်းၼၼ်ႉၼႃႇ
ၽဝၼႆႉ တေလႆႈဝူၼ်ႉႁႂ်ႈပေႃးၶိုၼ်းမႂ်ႇသေႇသေႇ -
ၸႂ်ႁၵ်ႉၼႃႈၵၢၼ်
ၸႂ်ႁၵ်ႉၽူဝ်လႄႈမေး
ၸႂ်ႁၵ်ႉၵၢၼ်ႁဵၼ်း
ၸႂ်ႁၵ်ႉပုၼ်ႈပၢင်ႈၵူၼ်းတင်းၼမ်
ဢၼ်လႂ်ၵေႃႈ တေလႆႈ renew ပၼ်မၼ်းႁႂ်ႈႁုၼ်ႈမႂ်ႇယဝ်ႉ
တႃႇႁုၼ်ႈမႂ်ႇၼၼ်ႉ လူတူၺ်းၼႆႉလူး -----–---
ပွၵ်ႈၼိုင်ႈ
တီႈၵုၼ် ယူးရူပ်ႉ Europe
ဝၢႆးသေ ပၢင်သိုၵ်းႁၢႆႉၸလူင် ယဝ်ႉၵႂႃႇၼၼ်ႉ
မေႈဢွၵ်ႇၵေႃႉၼိုင်ႈ
သမ်ႉလႆႈႁၼ် ၸဝ်ႈၽူဝ်လႄႈ
လုၵ်ႈၸၢႆးမၼ်းၵေႃႉလဵဝ်ၼၼ်ႉ
တၢႆၵႂႃႇထႅင်ႈ
ၵေႃႉၼိုင်ႈယဝ်ႉၵေႃႉၼိုင်ႈ
မၼ်းၵေႃႈ
ၸႂ်တူၵ်းၵၢၼ်းလိၼ်
ဢမ်ႇၶႂ်ႈၵိၼ်ၶႂ်ႈၼွၼ်း
ဢမ်ႇမီးတၢင်းမုင်ႈမွင်းလေႈ
ဢမ်ႇၶႂ်ႇယူႇၼႂ်းၶူင်းၵၢင်ယဝ်ႉၼႆဝႃႇ
လၢႆဝၼ်း ဢမ်ႇၵိၼ်ၶဝ်ႈယဝ်ႉ
ထိုင်ဝၼ်းၼိုင်ႈမႃး
ၶႂ်ႈၵိၼ်ၶဝ်ႈမုၼ်းၼႆလႄႈ
ဢႉၵ်ႇၵႂႃႇသိုဝ်ႉတီႈလၢၼ်ႉႁိမ်းႁိူၼ်း
ၽိူဝ်ႇမၼ်းပွၵ်ႈႁိူၼ်း
မီးမႅဝ်းၶေႃႉဢွၼ်ႇတူဝ်ၼိုင်ႈ
ႁွင်ႉသႅၼ်ႇလူင်မႃးၸွမ်းမၼ်း
သဵင်ႁွင်ႉမႅဝ်းၼၼ်ႉ
ပဵၼ်သဵင်ႁွင်ႇႁႃ တီႈပိုင်ႈၼႆ
ဢမ်ႇလၢၼ်ႈၵေႃႈ
တိုၼ်းႁူႉလႆႈလီလီယဝ်ႉ
မၼ်းၵေႃႈ
ဢဝ်ၶဝ်ႈမုၼ်း လဵင်ႉမႅဝ်းၶႅပ်းၼိုင်ႈ
မႅဝ်းဢွၼ်ႇၵေႃႈ
ၵိၼ်ႁိပ်ႈၵိၼ်ၼႅတ်ႈ
ပေႃးယဝ်ႉၵေႃႈ
ၸွမ်းမႃး
မႃးႁွင်ႉမႅဝ်းမႅဝ်းယူႇႁိမ်းၼႃႈတူ
မၼ်းၸင်ႇၽုၺ်ႇၽၵ်းတူပၼ်
မႅဝ်းဢွၼ်ၵေႃႈ
လႅၼ်ႈၶဝ်ႈမႃး
မႃးထူၶႃမၼ်း
မိူၼ်လၢတ်ႈဝႃႈ ယႃႇပေပွႆႇပႅတ်ႈၶႃႈၼႆ
မေႈဢွၵ်ႇၵေႃႈ
ၶဝ်ႈမိူဝ်းၼင်ႈဢွမ်ႇၾႆးသေ
ၵိၼ်ႈမုၼ်းၽၢၵ်ႇၼိုင်ႈ
လိူဝ်ၼၼ်ႉတႄႉ ဢဝ်လဵင်ႉမႅဝ်းဢွၼ်ႇထႅင်ႈ
ၽိူဝ်ႇမႅဝ်းဢွၼ်ႇၵိၼ်ဢွမ်ႇယဝ်ႇ
မၼ်းဢဝ်ႁူင်မၼ်း မႃးထူႁူဝ်ၶဝ်ႇ
မေႈဢွၵ်ႇသေ ႁႅၼ်တူၺ်းၼႃႈ
မိူၼ်ဝႃႈ ယွၼ်းပိုင်ႈဢိင်ၶႃႈ
တေႇၼၼ်ႉမႃး
မေႈဢွၵ်ႇဝႃႈ
ၵဝ်တေဢွၵ်ႇၵႂႃႇႁဵတ်းၵၢၼ် ႁႃငိုၼ်းၶိုၼ်း
ႁႂ်ႈလႆႈလဵင်ႉ မႅဝ်းဢွၼ်ႇၼႆႉၼႆ
ၸဝ်ႈၵဝ်ႇ
လႆႈယၢပ်ႇၵႃႈႁိုဝ်ၵေႃႈ
ဝူၼ်ႉတူၺ်း သတ်ႉတဝႃႇႁိမ်းႁွမ်းလူး
ၸဵမ်ၵူၼ်းၸဵမ်သတ်း
ၸိူဝ်းဢၼ်သႃႆၸႂ်ၶဝ်ပိုင်ႈဢိင်ၸဝ်ႈၵင်ႇၼၼ်ႉ
ပေႃးမီးၸဝ်ႈၵဝ်ႇ
ၶဝ်ၸင်ႇတေယူႇလႆႈဢိူဝ်ႈ
ဢဝ်ၵရုၼႃႇၼႆႉ
ပဵၼ်ႁႅင်းသေ
ႁပ်ႉတွၼ်ႈ 2023 ၼႃႈ
ၸဝ်ႈၶူးလူင်ထမ်ႇမသႃႇမိ
ၸၼ်ႉၸွမ်ပုတ်ႉထမိူင်းတႆး