လွင်ႈလႆႈမႃးႁဵၼ်းဢဝ်ၸုမ်ႈၶူး BA လိၵ်ႈလူင်

ၸၼ်ႉၸွမ်ပုတ်ႉထမိူင်းတႆးၼႆႉ ပဵၼ်ၸၼ်ႉၸွမ်ၸၢဝ်းပုတ်ႉ ဢၼ်ပူၵ်းတင်ႈ ၼႂ်းမိူင်းတႆး ဢွၼ်တၢင်းသုတ်း လင်ၼိုင်ႈ၊ ၸၼ်ႉၸွမ်ပုတ်ႉထလင်ၼႆႉ ၸဝ်ႈၶူးမေႃလူင် ၶမ်းမၢႆ ထမ်ႇမ သႃႇမိ ဢွၼ်ဢဝ် တပေးတၵႃႇသေလႄႈ တႄႇတင်ႈဝႆႉ ၼႂ်းပွၵ်ႉၽြႃးၶၢဝ် ဝဵင်းလူင်တူၼ်ႈတီး မိူဝ်ႈပီၶရဵတ်ႈ 2014။ ၼႂ်းၸၼ်ႉၸွမ်လင်ၼႆႉ မီးဝႆႉ ၶူးမေႃသွၼ်လူင်လႄႈ လုၵ်ႈႁဵၼ်းၶဝ် ၼႂ်းမိူင်းၼွၵ်ႈမိူင်းၼမ်သေ လႆႈပူင်သွၼ် ဝိၶျႃးၸေးမဵဝ်း မိူၼ်ၸၼ်ႉၸွမ်ပုတ်ႉထ တၢင်ႇ မိူင်း။ 

လိူဝ်သေ ဝိၶျႃးၸိူဝ်းၼၼ်ႉ သမ်ႉမီး ဝိၶျႃးၽၢႆႇ လိၵ်ႈလူင်ထႅင်ႈ၊ လွင်ႈလႆႈမီး ဝိၶျႃးလိၵ်ႈလူင် ၼႆႉ ၸဝ်ႈၶူးမေႃလူင် ၶမ်းမၢႆ ထမ်ႇမသႃႇမိ လႆႈၵွႃႇႁူႉႁၼ် လွင်ႈၸၼ်ႉၸွမ် ဢွၵ်ႉသၽူတ်ႉ မိူင်း ဢိင်ႇၵလၼ်ႇ ၽုၺ်ႇသဵၼ်ႈတၢင်းပၼ် ၵူၼ်းၸိူဝ်းဢၼ်ဢႃႇယူႉယႂ်ႇ မႃးၶိုၼ်ႈႁဵၼ်းဢဝ် ၸုမ်ႈၶူး၊ မၼ်းၸဝ်ႈ ၵွႃႇႁၼ်ၸိူင်ႉၼၼ်သေယဝ်ႉ ၸင်ႇဝူၼ်ႉထိုင် ၸဝ်ႈၸရေးၶဝ် ၸိူဝ်း ပဵၼ်ၽူႈပွင်ၵၢၼ်သႃႇသၼႃႇ ၸွမ်းဝၢၼ်ႈ ၸွမ်းမိူင်းႁဝ်းလႄႈ ၽူႈသူၼ်ၸႂ် လိၵ်ႈလူင်ၶဝ် သေ ၸင်ႇမႃးတင်ႈ ႁွင်ႈၵၢၼ်လဵပ်ႈႁဵၼ်းလိၵ်ႈလူင် တီႈၸၼ်ႉၸွမ်ပုတ်ႉထမိူင်းတႆး မိူဝ်ႈပီ 2019၊ တႄႇဢဝ်ၼၼ်ႉမႃး ႁွင်ႈၵၢၼ်လဵပ်ႈႁဵၼ်းလိၵ်ႈလူင် လႆႈပိုတ်ႇႁပ်ႉလုၵ်ႈႁဵၼ်းသေ မိူဝ်ႈ လဵဝ်မီးဝႆႉ လုၵ်ႈႁဵၼ်းသင်ႇၶ ၸဝ်ႈၸရေးၸၢႆး/ယိင်းၶဝ် ဢွၼ်ၵၼ်ၶိုၼ်ႈႁဵၼ်း ၽၢႆႇလိၵ်ႈ လူင်ဝႆႉ တၢင်းၼမ်ယဝ်ႉ။

တႃႇတေပူင်သွၼ်ပၼ် လိၵ်ႈထမ်း ၸုမ်းၶူး BA လိၵ်ႈလူင်ၼႆႉ မီးဝႆႉ ၶူးသွၼ်ၸဝ်ႈသင်ႇၶ လႄႈ ၶူးသွၼ်ၵူၼ်းႁိူၼ်း၊ ၶူးသွၼ်ၸိူဝ်းၼႆႉၸမ်ႉ ပဵၼ်ၽူႈဢၼ်လႆႈၸွမ်း  ၽၢႆႇၵၢၼ်ႁဵၼ်း သင်ႇၶသေဢမ်ႇၵႃး လႆႈသွၼ်ႁဵၼ်းဢဝ် ၸွမ်းလၢႆးပိူင်သွၼ် ဢၼ်ဝႆႉလုၵ်ႈႁဵၼ်း ပဵၼ်သူၼ် ၵၢင်ၼၼ်ႉမႃးလႄႈ ပဵၼ်ၶူးသွၼ် ၽူႈလူင်ႉလႅၼ်ႇ ၽၢႆႇသွၼ်ႁဵၼ်းယူႇယဝ်ႉ၊ ၵွပ်ႈၼၼ်လႄႈ ၸၼ်ႉၸွမ်ပုတ်ႉထမိူင်း တႆး ယုမ်ႇယမ် ၼၵ်းၼၵ်း ၼႃၼႃဝႃႈ “လွင်ႈသွၼ်ႁဵၼ်းဢဝ် ၸုမ်ႈၶူး BA လိၵ်ႈလူင်ၼႆႉ တေၽိူမ်ႉထႅမ်ပၼ်ၼမ်ႉၵတ်ႉ လုၵ်ႈႁဵၼ်းၶဝ် လႄႈ တေပဵၼ် ၽွၼ်းလီ ပုၼ်ႈတႃႇ ပုတ်ႉထသႃႇ သၼႃႇ ယႂ်ႇၼမ်ယူႇ” ၼႆယဝ်ႉ။

ႁူဝ်ၶေႃႈၵၢၼ်ႁဵၼ်းတႃႇၸုမ်ႈၶူး BA လိၵ်ႈလူင် 

တႃႇႁႂ်ႈပဵၼ် လွင်ႈၸွႆႈထႅမ် လုၵ်ႈႁဵၼ်းၶဝ်ၼၼ်ႉ ၸုမ်ႈၶူး BA ၼႆႉ မီး (12) ဝိၶျႃး ဢၼ်တေ လႆႈႁဵၼ်းဢဝ် မိူၼ်ၸိူင်ႉၼင်ႇ ၼႄဝႆႉ ပႃႈတႂ်ႈ ၸိူဝ်းၼႆႉယဝ်ႉ-

1. လဵပ်ႈႁဵၼ်းလွင်ႈလိၵ်ႈလူင် လႄႈ ၽိင်ႈလိၵ်ႈလူင်

2. လၢႆးတႅမ်ႈႁေႃးလိၵ်ႈလူင်

3. ထၢတ်းသၢင်လွၵ်းလၢႆးတႅမ်ႈလိၵ်ႈလူင်

4. ၵၢၼ်ၵမ်ႇမထၢၼ်း ၼႂ်းလိၵ်ႈလူင်

5. ၼႄႉၼမ်း ထမ်းပိတၵတ်ႈ

6. ဢၽိထမ်ႇမႃႇ တႃႇၸႂ်ႉၵူႈဝၼ်း

7. ၽႃႇသႃႇပႃႇလိ၊

8. ၽိင်ႈငႄႈဝိၼယတႃႇပုတ်ႉထၽႃႇသႃႇ

9. ပိုၼ်ႉထၢၼ်ဢင်းၵလိတ်ႉပုတ်ႉထၽႃႇသႃႇ

10. ပိုၼ်းပုတ်ႉထသႃႇသၼႃႇထေႇရဝၢတ်ႈ

11. ပိုၼ်းတႆးလႄႈ သႃႇသၼႃႇ

12. ဢႃႇယုဝေႇတ

ဝိၶျႃးၸိူဝ်းၼႆႉ ပဵၼ်ဢၼ်လမ်ႇလွင်ႈ တႃႇၼႂ်းၸၢတ်ႈပၢၼ်ၵူၼ်းတေႉတေႉယဝ်ႉ။

ၽႂ်တေတၢင်ႇလဝ်ႈ ၶဝ်ႈပဵၼ်လုၵ်ႈႁဵၼ်း ၸုမ်ႈၶူး BA လိၵ်ႈလူင်ၼႆႉလႆႈ

တႃႇတေၶဝ်သွၼ်ႁဵၼ်းဢဝ် ၸုမ်ႈၶူး BA လိၵ်ႈလူင်လႆႈၼႆႉ ႁႂ်ႈပဵၼ်ၽူႈဢၼ်လူင်ႉလႅၼ်ႇ လိၵ်ႈလူင်လႄႈ ၽိင်ႈလိၵ်ႈလူင် မီးၼမ်ႉၵတ်ႉ တႅမ်ႈလႆႈ လူလႆႈလိၵ်ႈလူင် ဢမ်ႇၼၼ် လိၵ်ႈ ဢေႃးၽႃႇမင်ႇၵလႃႇ၊ လိူဝ်သေၼႆႉ ႁႂ်ႈပဵၼ်ၽူႈဢၼ်မေႃတႅမ်ႈမေႃလူလိၵ်ႈမၢၼ်ႈ ဢၼ်ၵပ်း ၵၢႆႇလူၺ်ႈ လွင်ႈပုတ်ႉထၽႃႇသႃႇ ၸိူဝ်းၼႆႉယဝ်ႉ။ 

ပိူင်ထတ်းၼမ်ႉၵတ်ႉလုၵ်ႈႁဵၼ်း

ပိူင်ထတ်းလုၵ်ႈႁဵၼ်းဢၼ်ၼႆႉ ၸၢင်ႈႁဵတ်းႁႂ်ႈလုၵ်ႈႁဵၼ်းၶဝ် မီးၼမ်ႉၵတ်ႉ မေႃလူမေႃတႅမ် ၽၢႆႇလိၵ်ႈလၢႆး၊ ၼႂ်းပိူင်ထတ်း ၽၢႆႇလဵပ်ႈႁဵၼ်းလိၵ်ႈလူင်ၼႆႉ ပႃးဝႆႉ လွင်ႈႁုပ်ႈၵႅပ်ႈလိၵ်ႈ၊ လွင်ႈတႅမ်ႈ ဢႅတ်ႉသေးပွတ်း၊ လွင်ႈတႅမ်ႈဢႅတ်ႉသေးယၢဝ်း ISP၊ လွင်ႈၶိုၼ်ႈႁွတ်ႈ ပၢင်သွၼ် ၵူႈဝၼ်းလႄႈ လွင်ႈတႅမ်ႈတွပ်ႇလိၵ်ႈ ၸိူဝ်းၼႆႉယဝ်ႉ၊ ၼႂ်းပိူင် ထတ်းၸိူဝ်းၼႆႉ လွင်ႈတႅမ်ႈ တွပ်ႇလိၵ်ႈၸမ်ႉ ပဵၼ် တႃႇဝိၶျႃးပႃႇလိ လႄႈ ဢိင်းၵလိတ်ႈၵူၺ်း။

ပိူင်လဝ်ႈၶဝ်ႈႁဵၼ်း

ၽူႈလဝ်ႈၶဝ်ႈႁဵၼ်းၶဝ် တေလႆႈထႅမ်ၽိုၼ်တၢင်ႇလဝ်ႈလႄႈ ၽိုၼ်လိၵ်ႈၵမ်ႉ ပႃႈတႂ်ႈၸိူဝ်း ၼႆႉသေယဝ်ႉ သူင်ႇပၼ် တီႈလုမ်း ၽၢႆႇႁပ်ႉလုၵ်ႈႁဵၼ်း ၸၼ်ႉၸွမ်ပုတ်ႉထမိူင်းတႆးယဝ်ႉ။

ၽိုၼ်လိၵ်ႈၵမ်ႉ ဢၼ်တေလႆႈသူင်ႇမႃး မိူဝ်ႈတေ တွပ်ႇၶဝ်ႈၸၼ်ႉၸွမ်-

1. တေလႆႈတႅမ်ႈမႃး လင်ႇၵႃႇယၢဝ်း (12) ပႅၵ်ႈ တေႃႇထိုင် (16) ပႅၵ်ႈ၊ လင်ႇၵႃႇပွတ်း 50 ပႅၵ်ႈ၊ ဢမ်ႇၼၼ် ဢဝ်လိၵ်ႈလူင် ဢၼ် တႅမ်ႈဝႆႉ ဢမ်ႇၼၼ် ၽိုၼ်လိၵ်ႈၶူၼ်ႉၶႂႃႉ ၼႂ်းလိၵ်ႈလူင်  သေၽိုၼ်ၽိုၼ်။

2. ၽိုၼ်လိၵ်ႈသုၼ်ႇတူဝ် ဢၼ်တႅမ်ႈသပ်းလႅင်းၼႄ လွင်ႈၸဝ်ႈၵဝ်ႇသူၼ်ၸႂ် ၶႂ်ႈၶဝ်ႈႁဵၼ်း ၸုမ်ႈၶူး BA လိၵ်ႈလူင်လႄႈ ပိုၼ်းၵႅပ်ႈ တင်းတူဝ်ထူပ်းၸဝ်ႈၵဝ်ႇ။

3. ၽိုၼ်မိူၼ် ဝႂ်ဢွင်ႇပူၼ်ႉၸၼ်ႉလိၵ်ႈ (ၸၼ်ႉလူင်၊ ၸၼ်ႉသိပ်း) ဢမ်ႇၼၼ် ဝႂ်ယုၵ်ႉယွင်ႈ ဢၼ်ၼႄၼမ်ႉၵတ်ႉၸဝ်ႈၵဝ်ႇ။

4. လိၵ်ႈၵမ်ႉ ၸဝ်ႈၼင်ႈၵျွင်း ဢၼ်ၸဝ်ႈၵဝ်ႇ ႁဵတ်းၸရေး၊ ဢမ်ႇၼၼ် ႁူဝ်ပဝ်ႈဝၢၼ်ႈ ၽူႈ  ပွင်ၵၢၼ် ၶွၼ်ႇၽရႅၼ်ႉလိၵ်ႈလူင်။

5. ဝႂ်ၵူတ်ႇၸႅတ်ႈပၢႆးယူႇလီ။

6. ၽိုၼ်မိူၼ်ဝႂ်ၵပ်းတူဝ်။

ဝၼ်းႁပ်ႉၽိုၼ်တၢင်ႇလဝ်ႈလိုၼ်းသုတ်း-

ၽူႈဢၼ်သူၼ်ၸႂ် တၢင်ႇလဝ်ႈ ၶဝ်ႈႁဵၼ်းၼၼ်ႉ ၶႅၼ်းတေႃႈ သူင်ႇၽိုၼ်တၢင်ႇလဝ်ႈမႃး ၸဝ်ႉၸဝ်ႉ ၸဵဝ်းၸဵဝ်း ၵႃႈၼင်ႇ ပဵၼ်လႆႈသေၵမ်း၊ ဝၼ်းႁပ်ႉ ၽိုၼ်တၢင်ႇလဝ်ႈ လိုၼ်းသုတ်း ၸမ်ႉ ပဵၼ်လိူၼ် ၽေႇၽေႃႇဝႃႇရီႇ ဝၼ်းထိ 1 ပီ 2025 ၼီႈ။

ဝၼ်းတွပ်ႇၶဝ်ႈလႄႈတွင်ႈထၢမ်

ၽူႈဢၼ်လႆႈထိူၵ်ႈ လိူၵ်ႈၶဝ်ႈႁဵၼ်းလိၵ်ႈ တီႈ ၸၼ်ႉၸွမ်ၼၼ်ႉ တေလႆႈထုၵ်ႇၽိတ်ႈမွၵ်ႇ မႃး တွပ်ႇၶဝ်ႈလႄႈ တွင်ႈထၢမ် ၼႂ်းလိူၼ်မၢတ်ႉ ဝူင်ႈ ထီႉၼိုင်ႈ ပီ 2025 ၼၼ်ႉယဝ်ႉ။ တီႈပၢင်တွပ်ႇ လိၵ်ႈၼၼ်ႉ ၽူႈဢၼ်တေၶဝ်ႈပဵၼ်လုၵ်ႈႁဵၼ်း တီႈၸၼ်ႉၸွမ်ၼႆႉ တေလႆႈတွပ်ႇပၼ် ၶေႃႈ ထၢမ် ဢၼ်ၵပ်းၵၢႆႇပိုၼ်ႉႁူႉ ပႃႈတႂ်ႈၸိူဝ်းၼႆႉယဝ်ႉ-

1. ႁႂ်ႈႁေႃးၼႄလႄႈ သပ်းလႅင်းထတ်းသၢင်ၼႄ လိၵ်ႈလင်ႇၵႃႇလူင် ဢမ်ႇၼၼ် ၽိုၼ် လိၵ်ႈၶူၼ်ႉၶွႃႉ ဢၼ်ၸဝ်ႈၵဝ်ႇ တၢင်ႇမႃး၊

2. လိၵ်ႈမၢၼ်ႈ လႄႈ ၵႂၢမ်းမၢၼ်ႈ၊

3. ပိုၼ်ႉထၢၼ်ၽႃႇသႃႇပႃႇလိ၊

4. ပိုၼ်ႉထၢၼ်တၢင်းႁူႉထမ်းပိတၵၢတ်ႈ၊

ပၵ်းယဵမ်ႈဝၼ်းၶၢဝ်းယၢမ်းၵၢၼ်ႁဵၼ်း

1. ၶၢဝ်းယၢမ်း ၵၢၼ်ႁဵၼ်း ၸုပ်ႈၼိုင်ႈ- လိူၼ် မေႇ တေႃႇထိုင် လိူၼ်ၵျူႇလၢႆႇၼႆႉ တေလႆႈ ၶိုၼ်ႈႁဵၼ်း၊

2. ၶၢဝ်းယၢမ်း ၵၢၼ်ႁဵၼ်း ၸုပ်ႈသွင်- လိူၼ် ဢေႃးၵၢတ်ႉ တေႃႇထိုင် လိူၼ်ဢွၵ်ႉထူဝ်ႇပႃႇ ၼႆႉ  တေလႆႈၶိုၼ်ႈႁဵၼ်း၊ ထတ်းသၢင်လိၵ်ႈ လူင်လႄႈ တႅမ်ႈလိၵ်ႈလူင်၊ ၵဵပ်းသဵၼ်ႈမၢႆ လိၵ်ႈ လူင်။

3. ၶၢဝ်းယၢမ်းၵၢၼ်ႁဵၼ်း ၸုပ်ႈသၢမ်- လိူၼ် တီႇၸိၼ်ႇပိူဝ်ႇ တေႃႇထိုင် လိူၼ် ၽေႇၽေႃႇ ဝႃႇရီႇၼႆႉ တေလႆႈၶိုၼ်ႈႁဵၼ်း။

ၵႃႈၸႂ်ႉၸၢႆႇ တီႈယူႇလႄႈ လွင်ႈၵိၼ်ယႅမ်ႉ

တွၼ်ႈတႃႇၸဝ်ႈသင်ႇၶႃႇတႄႉ ၵႃႈၶိုၼ်ႈႁဵၼ်း ၵႃႈယူႇသဝ်းလႄႈ ၵႃႈၵိၼ်သုင်း ဢမ်ႇလႆႈ ပၼ်၊ တွၼ်ႈတႃႇၵူၼ်းႁိူၼ်းၵေႃႈ ၵႃႈၶိုၼ်ႈႁဵၼ်းလႄႈ ၵႃႈၵိၼ်ယႅမ်ႉ ဢမ်ႇလႆႈပၼ်ၼင်ႇ ၵဝ်ႇ၊ လွင်ႈယူႇသဝ်းတႄႉ တေၸွႆႈႁႃပၼ် တီႈသၢင်ႇထုၵ်ႇယဝ်ႉ။

ပေႃးႁပ်ႉပဵၼ် လုၵ်ႈႁဵၼ်းယဝ်ႉၸိုင် ၵႃႈၸႂ်ႉၸၢႆႇ ပႃႈတႂ်ႈၸိူဝ်းၼႆႉတႄႉ တေလႆႈၸၢႆႇ ႁင်းၵူၺ်း-

1. ၵႃႈမိူဝ်ႈသႂ်ႇသဵၼ်ႈမၢႆ ၶဝ်ႈပဵၼ်လုၵ်ႈႁဵၼ်း၊

2. ၵႃႈႁူင်းတူၺ်းလိၵ်ႈလႄႈ ၵႃႈသၢႆႈ (ပေႃးဢဝ် ပပ်ႉယွၵ်း/ပပ်ႉႁၢႆ)၊

3. ၵႃႈထႆႇၽိုၼ်မိူၼ် လႄႈ ထုၵ်ႈလိၵ်ႈ၊

4. ၵႃႈၸႂ်ႉၸၢႆႇ ပုၼ်ႈတႃႇ ဢွၵ်ႇၶၢဝ်းတၢင်းလဵပ်ႈ ႁဵၼ်းၶူၼ်ႉၶွႃႉ၊

5. ၵႃႈၸႂ်ႉၸၢႆႇႁပ်ႉၸုမ်ႈၶူး၊

မၢႆတွင်း

1. ပေႃးထႅမ်ၽွမ်ႇလႄႈ မီးလိၵ်ႈၵမ်ႉတဵမ်ထူၼ်ႈ ယဝ်ႉၸိုင် ထုၵ်ႇလီသူင်ႇထိုင် တီႈလုမ်းၽၢႆႇ ႁပ်ႉလုၵ်ႈႁဵၼ်း ၸၼ်ႉၸွမ်ပုတ်ႉထမိူင်းတႆး၊ ဝၼ်းလိုၼ်းသုတ်း လိူၼ်ၽေႇၽေႃႇဝႃႇရီႇ ဝၼ်းထိ 1 ပီ 2025၊ ပေႃးတူၵ်း လိုၼ်းသေၼၼ်ႉၸိုင် ဢမ်ႇၸၢင်ႈႁပ်ႉဢဝ် ၶဝ်ႈပဵၼ်လုၵ်ႈ ႁဵၼ်းလႆႈယဝ်ႉ။

2. လၢႆးသူင်ႇၽိုၼ်တၢင်ႇလဝ်ႈသွင်ပိူင်-

   -သူင်ႇၸွမ်း email-

      admission@ssbu.edu.mm      

   - မၢႆၽူင်း 081-2125674   

   -သူင်ႇၸွမ်းပုင်းလိၵ်ႈ (စာတိုက်)

    ကျောင်းသားလက်ခံရာဌာန၊

     ရှမ်းပြည်နယ်ဗုဒ္ဓတက္ကသိုလ်၊

     ဘုရားဖြူရပ်ကွက်၊ ပညာဗောဓိလမ်း၊

     တောင်ကြီးမြို့၊ ရှမ်းပြည်နယ်။

3. သင်ဝႃႈၶေႃႈမုၼ်း ပိူင်လဝ်ႈ ၶဝ်ႈႁဵၼ်း ဢမ်ႇ တဵမ်ထူၼ်ႈၸိုင် ဢမ်ႇၸၢင်ႈၽိတ်ႈမွၵ်ႈၶဝ်ႈ တွပ်ႇလိၵ်ႈ ပဵၼ်လုၵ်ႈႁဵၼ်းလႆႈ။

4. သင်လႆႈႁပ်ႉၶၢမ်ႇ ၶဝ်ႈပဵၼ်လုၵ်ႈႁဵၼ်းယဝ်ႉၸိုင် တေပွင်ႇၶၢဝ်ႇမႃး တင်းဢီးမဵဝ်း ဢမ်ႇ ၼၼ် တေသိုပ်ႇၽူၼ်းလၢတ်ႈ။